Carinderia ni Aling Cely

Standard

hot-air-3.jpg

Bumiyahe kami para manuod ng 12th International Hot Air Balloon Fiesta sa Clark Field, Pampanga nung isang linggo. Alas tres palang ng umaga ay gising na kami dahil sabi sa blog ni Anton mas maganda daw magpunta dun ng maaga para makaiwas sa pila at makita namin yung pagpapalobo sa mga hot air balloons. Hindi ko kilala si Anton pero naniwala naman ako sa kanya. Tama naman ang sabi niya. Kaya malamang paniwalaan ko pa ang ibang sasabihin niya.

Eniwei, hindi lang naman yung mga lobong naglalakihan ang sadya namin dun. Dahil andun na rin naman kami, pagkakataon na naman para lumafang ng masarap na pagkaing Kapampangan. Pinagmamalaki ng mgaKapampangan ang luto nila. Siyempre ang claim nila pagkain nila ang pinakamasarap sa lahat ng lutuin sa Pilipinas (well,nabasa ko lang naman yan). Hindi naman ako magwawala sa claim nila na yan dahil masarap naman talaga ang ilan sa mga lutuin nila.

Carinderia ni Aling Cely

So matapos kumuha ng mga litratong isasali sa photo contest (hindi ako kundi ng mga kasama ko) ay dumerecho kami sa Nepa Mart para kumain sa Cely’s Carinderia. Nabasa ko naman sa isang site yun (goodnewspilipinas.com). Parang bahay ang yari ng carinderia. Tapos maraming mga nagngingitiang waitress ang sasalubong sa yo. Kasabay pa nga namin nuon ang ilan sa mga foreigners na nakita namin dun sa Hot Air Balloon Fiesta. Yung isa pa yung Balloon Pilot ng entry Hot Air Balloon ng Japan na korteng pugita. Ang cute nun! Baka kung totoo yun ay hinuli na yun ng mga mamang nagtitinda ng calamares sa bangketa. Aba, tiba-tiba sila dun!

Nakaestante ang mga pagkain sa Cely’s Carinderia. Tuturo ka na lang ng gusto mo. Pero puede ka rin magpaluto sa kanila ng camaru (cricket) at batute (frog) na specialty rin nila. Hindi na ako umorder nun kasi mahihina ang sikmura ng mga kasama ko. Alam kong palilipatin nila ako ng mesa pag nakita nila yung kinakain ko. Kaya ang inorder namin, pako salad, chicken bbq at sisig. May libre pang sabaw ng bulalo na binigay ko na lang sa kasama ko kasi nga hindi ako kumakain ng baka. Sabi nila masarap daw. Pinakanagustuhan ko yung pako salad (fern, salted egg, onion, tomato and vinaigrette dressing).

asstd-056.jpg

Masaya kami sa kinain namin. Ang galing nga eh hindi na kailangan ng dessert. Tipid na kami! Kasi yung chicken bbq nila ay ulam na at dessert pa dahil sa sobrang tamis. Naalala ko tuloy yung kaibigan kong ang gustong dessert ay yung lasang ulam. Sigurado ko magugustuhan niya yun. Pero heto pa yung ibang pagkain sa Cely’s.

Cely’s Specialties

Isa pang dahilan kung bakit masarap kumain sa Cely’s ay dahil nga lang kumakain ka sa kusina mo. Kumportable ka na at wala kang iintindhin na baka may nabe-break kang proper etiquette (naku sinuway ko na ata lahat ng turo sa Personality Development Class namin nung HS). Hindi ka mahihiya na humigop ng sabaw na mainit ng malakas. Slurp!!!! Hindi ka mahihiyang magkamay (bakit ba, masarap naman talaga kumain ng nakakamay ah). Tapos busog ka na hindi pa iiyak ang wallet mo. Ang total bill namin =P280.00 lang para sa 2 order ng chicken bbq, 1 order ng sisig, 2 order ng pako salad at 4 na order ng kanin. O-ha san ka pa! Wala pang tig-isang daan ang bawat isa sa amin.

Isa ito sa mga babalik-balikan ko na kainan sa Pampanga.

(Ang Cely’s Carinderia ay nasa tapat ng Nepo Mart sa Angeles City, Pampanga. May 15 minuto pa ang layo nito sa Clark, Pampanga.)

Advertisements